Y Llyfr Adferiad ar gyfer Ceredigion

Arweinlyfr hunan gymorth a gyhoeddwyd yn wreiddiol gan Mind Norwich yn 2005 yw’r Llyfr Adferiad ar gyfer Ceredigion. Cafodd ei adolygu’n llwyr ar gyfer Ceredigion gydag adran newydd ar gyfer sefydliadau a chysylltiadau lleol a rhagair gan Gwyneth Lewis, Bardd Cenedlaethol Cymru yn 2005-6. Codi Calon, sefydliad partneriaeth leol, sydd yn gyfrifol am ei gyhoeddi yma. Dywedodd awdur y llyfr, Jim Green, o Mind Norwich:

“Mae’r Llyfr Adferiad yn adnodd ymarferol sydd yn cynnig cwmnïaeth i’r rhai sydd yn dioddef, ond sydd ar daith gadarnhaol bywyd tuag at wella. Fe’i seiliwyd ar ganfyddiadau allweddol y rhai hynny sydd wedi teithio’r llwybr hwnnw. Rydym yn falch iawn bod cynulleidfa gwbl newydd yn medru elwa o’r llyfr o ganlyniad i waith Codi Calon.”

Mae’r Llyfr Adferiad ar gyfer Ceredigion ar gael drwy’r sefydliadau sydd yn gweithio dros iechyd meddwl ac mewn llyfrgelloedd lleol. Gallwch brynu copi am £5 (gan gynnwys cludiant a phacio) trwy gysylltu â Chodi Calon.

Neges gan Gwyneth Lewis

Os yw’ch bywyd wedi’i chwalu’n deilchion erioed, byddwch yn gwybod o brofiad pa mor anodd yw cael trefn arno unwaith eto.

Gall llawer o gyngor pobl sydd yn bwriadu’n dda ymddangos yn astrus. Er enghraifft, dywedwyd wrtha i rywdro y dylwn adael rhywbeth oedd yn fy mhoeni ‘i fynd’. Roedd yn swnio’n hawdd ond ni ddywedodd unrhyw un wrtha i sut oedd ‘gadael fynd’. Tan i ffrind ddoeth egluro ryw ddiwrnod mai peidio â meddwl am y pwnc am ychydig funudau ar y tro oedd ystyr hynny. Yna, gydag ymarfer, gallai hynny ymestyn i oriau ac yna ddyddiau heb fynd ar y cylchdro meddyliol dieflig a fu yn fy mhoenydio.

Mae’r llawlyfr hwn ar gyfer unrhyw un sydd eisiau gwybod sut i wella o unrhyw waeledd nerfol neu argyfwng. Nid yw cyffrediniaethau o unrhyw werth pan fyddwch yn daer i wneud rhywbeth i deimlo’n well. Mae beth ddylid ei wneud yn aml yn aneglur.

Mae yma awgrymiadau penodol ar gyfer gweithredu a fydd yn eich rhoi ar y llwybr i wella. Buasai’n dda gen i petai’r adnodd hwn wedi bod ar gael i mi yn y gorffennol. Cadwch ef wrth ymyl eich blwch Cymorth Cyntaf ac yn fwy pwysig fyth, peidiwch â digalonni. Mae yna ffordd yn ôl i fywyd cyfoethog a gwerthfawr.

Gwyneth Lewis